Qytetarët e Bashkimit Evropian, Komisioni dhe Parlamenti ranë dakord tre vjet më parë që të mos ketë më orë verore apo dimërore.
Por këtë të diel të fundit të tetorit, akrepat shkuan sërish 60 minuta pas sepse çështja ka ngecur në Këshillin Evropian.
Përfaqësia e 27 vendeve anëtare nuk ka mundur të bjerë në ujdi që nga viti 2019, kur filluan konsultimet. Brexit, ndryshimet e klimës, pandemia e koronavirusit apo të tjera problematika më të rëndësishme duket se e lanë në hije premtimin para zgjedhjeve evropiane.
Kritikët shprehen se kjo zvarritje turpëruese e Bashkimit Evropian për një çështje të thjeshtë tregon problemet themelore të unionit edhe në mënyrën e veprimit me pandeminë, klimën, Kinën, shtetin ligjor në Poloni etj. Gjithmonë duhen kompromise dhe shumë kohë, që të arrihet një zgjidhje.
Ata që mbështesin ndryshimin e orës thonë se orët më të gjata të ditës në verë ndihmojnë për të mbledhur energji e për të rritur produktivitetin në punë. Por kundërshtarët argumentojnë se është shumë e vështirë të përshtatesh me ndryshimin e orës dhe se kjo gjë ndikon negativisht në çështje të shëndetit.
