Bashkimi Europian, në kundërpërgjigje ndaj politikës tregtare të Donald Trump ka vendosur tarifa hakmarrëse për mallrat e SHBA.
Ato hyjnë në fuqi nga kjo e premte.
Taksat prekin artikuj me vlerë të përgjithshme 2,8 miliardë euro, duke shënjestruar edhe produkte të rëndësishme për SHBA-në si uiski, motoçikletat dhe lëngu i portokallit.
Presidenti i Komisionit Europian Jean-Claude Juncker është shprehur se taksat e imponuara nga SHBA për BE-në kundërshtojnë “të gjithë logjikën dhe historinë” prandaj edhe unioni do të përgjigjet me qartësi e maturi.
India, ndërkohë, ka ngritur taksat mbi 29 produkte të importuara nga SHBA – duke përfshirë disa mallra bujqësore, e po ashtu produkte çeliku dhe hekuri, si hakmarrje për tarifat e rënda të vendosura më herët nga Uashingtoni.
Tarifat e reja do të hyjnë në fuqi nga 4 gushti për bajamet dhe arrat.
India është një blerës kyç i eksporteve të bajameve amerikane dhe kështu masa pritet të dëmtojë fermerët në Amerikë.
Administrata Trump njoftoi në mars se do të vendoste tarifat prej 25% në çelik dhe 10% në alumin të importuara në SHBA. Ato hynë në fuqi më 1 qershor dhe ndikuan në BE, Kanada, Meksikë dhe aleatë të tjerë të ngushtë të SHBA, përfshirë Indinë. Më parë gjatë javës, Trump kërcënoi të impononte taksa të reja me 10% për një vlerë shtesë prej 200 miliardë dollarësh të mallrave kineze, për të cilat ai tha se do të hyjnë në fuqi nëse Kina “refuzon të ndryshojë praktikat e saj”. Megjithatë, Kina akuzoi SHBA për një akt “presioni ekstrem dhe shantazh” dhe paralajmëroi se do të përgjigjet ashpër.
