Një 43-vjeçar, i cili ndërtoi një objekt pa leje dhe kishte nisur të ndërtonte gjithashtu pa leje një objekt tjetër është arrestuar nga policia e Tiranës.
Ai gjithashtu kishte ndotur lumin e Tiranës, pasi shkarkonte aty mbetjet (inerte) nga punimet e ndërtimit.
“Gjatë kontrolleve të kryera në të gjithë territorin e qarkut Tiranë, kryesisht në afërsi të sipërfaqeve ujore, të cilat mund të shfrytëzohen ilegalisht, për marrje inertesh, me qëllim ndërtimi, ose mund të ndoten nga hedhja e mbetjeve të ndryshme, shërbimet e Komisariatit të Policisë Nr. 4 konstatuan në rrugën “Myslym Keta”, një rast në këtë fushë.
Për rastin, në kuadër të operacionit “Bazamenti”, si dhe si rezultat i hetimeve, u vu në pranga shtetasi L. K., 43 vjeç, banues në Tiranë”, njoftojnë blutë.
43-vjeçari dyshohet se ka ndërtuar 1 objekt pa leje (kapanon). Nga verifikimet rezultoi se ai kishte filluar punimet për ndërtimin e një objekti tjetër, gjithashtu pa leje. Më tej rezultoi se mbetjet nga punimet e ndërtimit, 43-vjeçari i hidhte në lumin e Tiranës, dhe si pasojë, shkaktonte ndotje.
Kontrollet, me objektiv konstatimin dhe goditjen e krimeve kundër mjedisit, vijojnë.
