“Basti” suedez me koronavirusin, të gjitha hapur, shkolla, biznese, bare e kafene
Suedia ka qenë një ndër vendet më të komentuara për shkak të trajtimit të cështjes së koronavirusit. Vendi nuk mori asnjë masë si shumë nga fqinjët e tjerë europiane, që nga mbyllja e kufijve, deri tek respektimi i distancës.
Kudo në vend shikon njerëz nëpër rrugë, bare dhe kafene, ndërsa fëmijët kanë vijuar normalisht jetën, duke shkuar nëpër shkolla. Vetëm studentët u detyruan të respektojnë distancën nëpër klasa. Po ashtu edhe bizneset, nga sallonet e bukurisë deri tek restorantet, kanë vijuar normalisht.
Të vetmet masa që ndërmori qeveria, ishte ndalimi i vizitave në azilet e të moshuarve që nga 1 prilli, si dhe kufizimi i lëvizjeve të panevojshme. Të gjithë qytetarëve iu kërkua mbajtja e distancës dhe mbajtja e përgjegjësisë personale.
Ministrja suedeze e shëndetësisë dhe cështjeve sociale, tha se vend i saj nuk ka asnjë strategji për të krijuar imunitetin e tufës, si përgjigje ndaj Covid 19. Vendi sipas saj, ka një përgjegjësi, shpëtimin e jetëve dhe mbrojtjen e shëndetit public, me një vëmendje të theksuar tek azilet.
Zyrtarët e shëndetit public shprehen për mediat se koha do të tregojë nëse izolimi, apo mos-izolimi i Suedisë dhe imuniteti I njerëzve në përballjen me infeksionin, ishin të suksesshme.
Sipas tyre masat e rrepta shërbejnë vetëm për të ulur kurbën e infeksionit dhe të vdekshmërisë, por kjo nuk do të thotë se virusi do të zhduket.
Edhe ministrja e Jashtme i Suedisë tha për The Guardian se është ende shumë herët për të gjykuar qasjen e vendit ndaj coronavirusit.
Aktualisht vendi numëron mbi 2.200 viktima dhe rreth 19 mijë të infektuar, ose ndryshe 225 viktima për 1 milion banorë, shifër më e lartë se vendet fqinj.
Shtetet e tjera nordike të cilat kanë një ngjashmëri kulturore dhe gjeografike, janë në contrast të madh me Suedinë. Finlanda, shpalli gjendjen e jashtëzakonshme, po ashtu Danimarka, dhe Norvegjia, por edhe Gjermania vende të cilat njoftuan lehtësimin e masave jo më larg se 10 ditë më parë.
Pjesa tjetër e Eurpës, Italia, Spanja Franca, janë vendet më të prekura.
Britania e Madhe është e vetmja në Europë që nuk ka marrë ende në konsideratë heqjen ekufizimeve. Vendi numëron aktualisht 21 mijë të vdekur nga koronavirusi, dhe më shumë se 157 mijë të infektuar.
