Kreu i Partisë Demokratike, Lulzim Basha ndërsa ishte i pranishëm në Kuvendin e PD dega Fier ku po zgjidhen strukturat e reja drejtuese, ka akuzuar sërish klasën politike si të korruptuar.
Basha theksoi se të gjithë duke nënkuptuar kryeministrin Edi Rama, ish-kryeministrin Sali Berisha dhe kreun e PL Ilir Meta, se janë të korruptuar dhe po sulmojnë SPAK-un për të mos bërë punën që i takon.
Ai theksoi edhe njëherë se PD është në krah të SPAK dhe Reformës së re në Drejtësi.
“Këta të gjithë janë të zhytur në korrupsion. Kjo është arsyeja se pse i janë turur SPAK-ut. E them me bindje se PD është në krah të drejtësisë së re, në krah të SPAK-ut që të vënë para drejtësisë të korruptuarit. SPAK nuk është perfekt, por është e vetmja shpresë që do vërë para përgjegjësisë të gjithë ata që kanë abuzuar me paratë, pronat dhe pasuritë e shqiptarëve. Reforma zgjedhore, mbështetja ndaj SPAK dhe programi që do u japë zgjidhje problemeve, janë tre kolonat mbështetëse të PD për t’u kthyer në shpresë për ndryshim për të gjithë shqiptarët”, deklaroi Basha.
/Vizionplus.tv/
