Humbjen e kandidatit të djathtë Sherefedin Shehu në Dibër, kryetari i Partisë Demokratike e justifikoi, duke thënë se ishte karteli i drogës ai që diktoi rezultatin. Gjatë një konferencë për shtyp nga selia e Partisë Demokratike, Basha falënderoi votuesit, të cilët sipas tij, nuk u blenë nga krimi e korrupsioni.
“Ne e humbëm këtë betejë por dua të falenderoj sot me zemër 14518 qytetarë, burra dhe gra të Dibrës, e në veçanti vajzat dhe djelmninë dibrane që nuk u joshën, nuk u blenë, nuk u shitën, nuk u trembën, nuk u mposhtën por votuan për bindjen e tyre të lirë. Në Dibër, PD dhe qytetarët e ndershëm të cilët besojnë tek proçesi politik, tek zgjedhjet e lira dhe të ndershme u përballën me kartelin e drogës, krimit dhe korrupsionit i cili ushtron dhunë për të mbajtur nën kontroll qeverisjen. Fatkeqësisht këtë betejë e fitoi karteli i krimit dhe humbi politika”.
Kryetari i Partisë Demokratike Basha tha se në Dibër humbi politika, ndërsa votën e qytetarëve pro Muharem Ramës, e cilësoi si të shtyrë nga presioni dhe frika.
“Në Dibër nuk humbi vetëm një parti politike, por humbi e gjithë Shqipëria. Humbi politika e ndershme, humbi liria, dinjiteti njerëzor. Në Dibër humbën dhe të varfrit që u joshën nga paratë e krimit, korrupsionit dhe paratë e drogës. Humbën dhe ata që u trembën para presionit të pushtetit, kriminelëve të veshur me pushtet, segmentëve të policisë të bërë njësh me krimin. Humbën dhe ata që nuk menduan për të nesërmen por panë vetëm përfitimin e momentit. Në Dibër humbën dhe ata që votuan për Muharrem Ramën. Koha do ta tregojë se të vetmit fitues sot në Dibër ishin pushteti abuziv i Edi Ramës, klientët e tij dhe krimi i lidhur me të. Humbën dhe ata që nuk menduan për të nesërmen por panë vetëm përfitimin e momentit. Në Dibër humbën dhe ata që votuan për Muharrem Ramën. Koha do ta tregojë se të vetmit fitues sot në Dibër ishin pushteti abuziv i Edi Ramës, klientët e tij dhe krimi i lidhur me të”.
Në mbyllje, Basha ftoi të gjithë elektoratin e djathtë që të reflektojnë dhe të shohin përpara. Mbi të gjitha të fillojmë të punojmë që Dibra të mos jetë akti i parë i dramës që Edi Rama po përgatit për zgjedhjet parlamentare, përfundoi kreu i Partisë Demokratike.
