Basha: Rama po punon për mafian

Kryetari demokrat Lulzim Basha akuzon kryeministrin Rama, se me miratimin e ligjit për importin e plehrave, i shërben një pakice që po pasurohet në kurriz të shumicës. Sipas Bashes, ligji është bërë vetëm për interesa korruptive dhe kriminale. Në një reagim në Facebook, kreu i opozitës thotë se loja me plehrat është e rrezikshme. Ai kujton se kudo në botë, gjenden mijëra ton mbetje të rrezikshme dhe të dëmshme që presin të shkarkohen diku. Basha shkruan me tej se një pjesë e tregtisë ndërkombëtare te plehrave është nën kontrollin e grupeve të dyshimta dhe kriminale. Sipas tij, të gjithë ata kërkojnë të gjejnë vende ku nuk ka rend e siguri, ku politikanët të korruptuar jane të gatshëm të shiten për para. Basha thekson se Shqipëria e Edi Ramës është vendi ideal për këtë gjë. Ai ve ne dukje se në Shqipëri trafikohen me dhjetëra mijëra tonë drogë. Në këto kushte është e sigurte, – shkruan Basha – se plehrat do të sjellin helm në Shqipëri. Kreu i PD-së nënvizon se pas miratimit të ligjit, kryeministri ka filluar një fushatë manipulimi, kërcënimi dhe keqinformimi, për t’i detyruar njerëzit të mbyllin gojën dhe t’i nënshtrohen vullnetit të tij.