Kreu i demokratëve, Lulzim Basha është zhvendosur këtë të hënë në Kombinat, ku zhvilloi takime me pronarët e biznesit të vogël dhe banorët e zonës.
Përmes një “video-live” në Facebook, lideri i PD-së theksoi se janë shtuar listat me personat që nuk kanë mundësi të paguajnë ushqimet, ndërsa përsëriti se qytetarët janë lënë në mëshirë të fatit.
“Situata ekonomike është në qendër të takimeve të mia. Ka një rënie të konsumit si kurrë më parë. Është i njëjti realitet si vendet dhe qytetet e tjera ku bizneset po falimentojnë, njerëzit nuk plotësojnë dot as nevojat minimale. Dhe fjala e parë është listat, janë shtuar listat e personave që nuk kanë mundësi të paguajnë, tek dyqanet e bukës, ushimeve. Varfëria kudo, Bizneset dhe qytetarët janë lënë në mëshirë të fatit. Ndërkohë Edi Rama bredh në Europë me mijëra euro që do të mjaftonin për të mbajtur mijëra biznese apo të ndihmonte qindra familje.”
Basha pohoi se paratë e shqiptarëve, Rama i ka shfrytëzuar për të ndihmuar oligarkët.
“Konfirmohet dhe nga Banka Batërore që 1/3 familje shqiptare ka prekur fundin. Nuk kishte pse të ishte kështu. S’kishte pse kriza të rrënonte ekonominë. Por paratë tuaja në vend që t’iu ndihmonin, për t’iu çliruara, paratë shkuan tek oligarkët kontratat korruptive, shkatërrimi i pronës publike. Kjo situatë e tmerrshme ka një përgjegjës, ai që ka vënë interesat e xhepat e tij, nuk i dhimbsen shqiptarët. Ne kemi vizionin për të ndryshuar këtë situatë. Do vazhdoj takimet nga Kombinati. Qëllim kryesor është të jem afër njerëzve dhe jo e zbukuruar nga propaganda duke gënjyer me regji qëndrore. Ai i ka bërë paratë rrush e kumbulla, që ikën në fundjavë në Paris me charter, dhe ua ka dhënë lekët oligarkëve.”
