Kryetari i PD Lulzim Basha nga Korça premtoi ndryshim për të gjithë shqiptarët pas 25 prillit. Basha është ndalur së pari për te takuar mbështetësit e PD që kishin dal ta prisnin në hyrje të qytetit.
LULZIM BASHA
KRYETAR I PD
“Ju nuk po e prisni ndryshimin, ju po i prini ndryshimit dhe kudo ku i prihet ndryshimit. Shqipëria ndryshon, Shqipëria fiton!”
Më pas Basha ka ndezur një qiri tek vendi i njohur si Lëndina e Lotëve, që shënjon vendin nga i cili korçarët niseshin për t’u larguar nga vendi.
Ndalesa e Bashes tek Lëndina e Lotëve lidhet me nje fenomen per te cilin opozita ka folur shpesh keto kohe, largimin e te rinjve nga vendi. Sipas Bashës, shifrat në rritje të të rinjve që largohen janë përgjegjësi e qeverisë Rama.
“Këto 8 vite Korça njësoj si gjithë Shqipëria mbeti në vend numëro. Mbeti vend numëro sepse çdo kush e bëri detyrën e vetë në këto kohë të vështira, prindi ndaj fëmijës, ju të rinjtë ndaj familjes dhe ndaj investimeve që ata kanë bërë te ju. Me përjashtim të dikujt qeveris dhe kryeministrit në ikje i cili Korçën e ka përdorur dhe e përdorë vetëm si resortin e fundjavës.”
Basha ka shpjeguar se për të luftuar emigracionin PD do të investojë në trajnimin e të rinjve e do synojë të hapë vende të reja pune.
“Qeveria ime do të ofrojë 20 trajnime profesionale për rininë shqiptare në fusha nga teknologjia e informacionit dhe programimi, tek inxhinieritë dhe profesionet që kanë të bëjnë me prioritetet tona të zhvillimit ekonomik, siç janë turizmi, siç janë arkitektura, siç janë degë të tjera për të cilat kanë nevojë të madhe tregu i punës i Europës.
Ndërsa gjatë takimit me mësues e pedagogë në Korçë, Basha premtoi së pari anulimin e ligjit për arsimin e lartë dhe dyfishimin e buxhetit për arsimin.
“Me këtë dyfishim të buxhetit ne synojmë dy objektiva. Së pari, ne synojmë të zërojmë tarifën për bachelor dhe master për të gjithë ata që vijnë nga familje me të ardhura nën 640 mijë lekë të vjetra në muaj dhe ta përgjysmojmë për ata që vijnë me të ardhura mbi këtë shumë. Së dyti me gjysmën tjetër të kësaj rritje synojmë dhe do të arrijmë së bashku, bashkë me fondet e Bashkimit Europian përmirësimin e të gjitha aspekteve të mësimdhënies.”
Gjatë vizitës në Korçë, Basha zgjodhi të bisedojë me mjekun Maqo Andoni, të cilit ii shpjegoi se PD synon që rroga e doktorëve në Shqipëri të shkojë në nivelin 1200 euro.
Por përtej bisedave politike, Basha shijoi edhe gatimet e zonës së Korçës.
