Kryetari i Partisë Demokratike kërkoi që pjesë e reformës zgjedhore të jetë edhe votimi elektronik. Sipas tij, në procesin e ardhshëm zgjedhor duhet që shqiptarët të votojnë duke përdorur teknologjinë. Në një bashkëbisedim me qytetarët në “Facebook”, kryedemokrati e hodhi topin në fushën e mazhorancës për të dhënë dakordësinë për këtë pikë.
“Po, votimi elektronik, numërimi elektronik por edhe identifikimi biometrik, janë dhe mbeten prioritete për në në Reformën Zgjedhore. Ne duam dhe do të bëjmë gjithçka që në zgjedhjet e ardhshme të përdoret teknologjia dhe shqiptarët të votojnë në mënyrë sa më të sigurtë. Natyrisht nuk varet vetëm nga ne. Pala tjetër duhet të bjerë dakord po kështu dhe e dyta, pala tjetër duhet të kishte nisur prej kohësh hapat për ta blerë këtë sistem, për ta testuar këtë sistem. Megjithatë më mirë vonë se kurrë. Ne do të bëjmë gjithçka që shqiptarët të votojnë me pasisje elektronike në zgjedhjet e ardhshme parlamentare dhe ato vendore në një ditë.”
