Kryetari i Partisë Demokratike, Lulzim Basha deklaroi sot se prej ditës së parë të lëvizjes sonë kemi thënë, ne ngrihemi bashkë.
Në një postim ne Facebook, Basha në vijim u shpreh se “Ngrihemi bashkë për zgjedhje të lira dhe të ndershme. Ngrihemi bashkë për një Republikë të Re, e cila nuk do të jetë as vetëm e demokratëve, as vetëm e socialistëve, por e të gjithë shqiptarëve të ndershëm. Një Republikë të drejtësisë, të demokracisë dhe lirisë së vërtetë. Si ato që shohim, ëndërrojmë dhe drejt të cilave arratisen qindra mijëra shqiptarë në dëshpërimin dhe mungesën e shpresës në vendin e tyre”.
Më tej Basha shton se “Që të jetë e tillë kjo Republikë, pushteti duhet të burojë nga qytetarët me votë të lirë dhe të ndershme. Pushteti duhet të japë llogari dhe të përgjigjet me të vërtetë para qytetarëve, jo një herë në katër vite, por katër herë në ditë, në mënyrë që fati i çdo politikani dhe i çdo pushtetari, në qeverisje apo pushtetar moral në opozitë, të jetë i lidhur pazgjithshmërisht me një faktor sovran të Shqipërisë, që jeni ju, janë qytetarët shqiptarë”.
“Nuk ka asnjë mekanizëm tjetër për ta garantuar këtë. Asnjë model, asnjë formulë, asnjë recetë, përveç zgjedhjeve të lira dhe të ndershme. Asnjë reformë tjetër nuk garanton lirinë e njerëzve. Asnjë reformë tjetër nuk garanton stabilitetin, demokracinë dhe shtetin ligjor. #NgrihemiBashke #ZgjedhjeTeLira #RepublikaeRe”, tha Basha.
