Kryetari i Partisë Demokratike, Lulzim Basha ka mbledhur këtë të martë Kolegjin e Kryetarëve. Në fjalën e tij, Basha ka vënë theksin tek Kuvendi Kombëtar, i mbajtur të shtunën.
Kryedemokrati falenderoi delegatët e PD, ndërsa nënvizoi se kjo forcë politike po i nënshtrohet një reformë që do e çojë përpara.
“Pjesëmarrjet në Kuvendet Kombëtare që për fat të mirë janë të dëshmuara nga media nuk janë thjesht mbledhje të delegatëve, mesazhet që jepen në fjalimet e delegatëve, po ashtu fryma që përçohet përmes pranisë së tyre është një tregues i qartë. Duke përsëritur dhe njëherë mirënjohje dua ti drejtohem delegatë të Kuvendit të PD i falenderoj edhe njëherë për pjesëmarrjen, vetëdijen politike dhe integritetin. Në themel të të gjithë kësaj qëndron një vetëdije e përbashkët se PD nuk ekziston për t’i shërbyer vetes së saj por për t’i shërbyer interesit të saj. Kjo vetëdije na ka mbajtur gjallë në furinë e goditjeve të njëpanjëhsme nga të tre këndet e kastës së vjetër politike që motiv kanë interesat e kësaj kaste politike të lidhura me interesat financiare dhe kriminale që po dalin e po shpalosen para botës si pasojë e hetimeve të strukturave të posaçme”, tha Basha.
Basha shtoi se demokratët kërkojnë që PD të ketë në qendër njerëzit dhe jo intereset personale.
