Basha mbështet Kosovën për “targat”: Qëndrimet e Beogradit, zbulojnë qëllimet e vërteta të Vuçiç

Pas tensioneve të krijuara mes Kosovës e Serbisë me vendosjen e reciprocitetit për çështjen e targave nga Prishtina, ka ardhur edhe një reagim nga kryedemokrati Lulzim Basha.

Në një postim në ‘Twitter”, lideri demokrat shkruan se Kosova është shtet i pavarur dhe marrëdhëniet mes dy shtetesh sovrane funksionojnë mbi baza reciprociteti.

“Gjuha kërcënuese e Beogradit i përket një të shkuare që askush nuk e kthen dot më! Kosova është shtet i pavarur dhe marrëdhëniet mes dy shtetesh sovrane funksionojnë mbi baza reciprociteti. Kjo është e drejtë e patjetërsueshme e Kosovës. Sa më shpejt ta kuptojë këtë Beogradi aq më mirë do të jetë për Serbinë dhe për marrëdhëniet mes vendeve të rajonit. Qëndrimet e Beogradit ndaj vendimit legjitim dhe që nuk cenon asnjë marrëveshje të nënshkruar në Bruksel nga qeveria e Republikës së Kosovës, zbulojnë qëllimet e vërteta të Vuçiç dhe fshehjen pas falsitetit të iniciativës së Novi Sadit”, shkruan Basha.