Kryetari i Partisë Demokratike, Lulzim Basha reagoi për 22-vjetorin e Epopesë së Ushtrisë Çlirimtare të Kosovës. Me anë të një mesazhi në “Facebook”, Basha kujtoi veprën e Adem Jasharit dhe u shpreh se ka ende shumë punë për t’u bërë për të përmbushur amanetin e tij.
“Epopeja e familjes Jashari me në krye komandantin legjendar të Ushtrisë Çlirimtare të Kosovës, Adem Jasharin vuri gjakun në themelet e Kosovës së lirë e të pavarur! Sot përulemi me nderim përpara veprës se Adem Jasharit, familjes Jashari, bijave dhe bijve të Kosovës që dhanë jetën dhe kurrë nuk u dorëzuan para masakrave, terrorit dhe genocidit barbar. Sot teksa gëzojmë lirinë e Kosovës kemi akoma shumë për të përmbushur amanetin e heronjve tanë në Shqipëri e Kosovë. Por jam i bindur se kombi do t’ja dalë të ndërtojë mbi sakrificat e martirëve, të nesërmen e dinjitetit dhe standarteve europiane.”
Kryedemokrati shtoi se veprat e Adem Jasharit do të mbahen mend përjetë dhe se ai do të jetë i pavdekshëm.
“Lavdi e pavdekshme komandantit legjendar të Ushtrisë Çlirimtare të Kosovës Adem Jashari, nderim përjetë familjes Jashari dhe bijve e bijave të Kosovës që dhanë jetën per liri!”
Kuvendi i Kosovës ka mbajtur këtë të enjte një seancë të veçantë për 22-vjetorin e Epopesë së Ushtrisë Çlirimtare të Kosovës. Kryeministri Albin Kurti theksoi se Adem Jashari ishte i destinuar të bënte histori.
