“Nëse guxoni t’i vini minat Teatrit Kombëtar të jeni të sigurtë që minat do t’jua vëmë kullave tuaja, me ligj.”
Me këtë paralajmërim lideri i opozitës Lulzim Basha theksoi se aksioni i PD në mbrojtje të teatrit do të vazhdojë pavarësisht vendimit te presidentit apo vullnetit të mazhorancës. Sipas kryedemokratit nuk ka shanse që dikush të gëzojë frutet e këtij investimi duke paralajmëruar se ditën që PD do të vijë në pushtet ligji anti-mafia do të veprojë edhe për këto biznese.
“Çdo veprim i Fusha ShPK dhe i çdo entiteti tjetër do të jetë subjekt i një ligji të amenduar anti-mafia. Do t’ju fillojmë që ditën e parë të biznesit dhe në bazë të ligjit anti-mafia do t’ju sekuestrojmë çdo centimetër katror dhe çdo cent, qindarkë, euro, për shkeljet që do t’ju konstatojmë.”
Basha ka sqaruar edhe bashkëpunimin që kjo kompani ka pasur me bashkinë e Tiranës kur ajo drejtohej nga vetë ai.
“Fusha” ishte kontraktor i sheshit nën Edi Ramën dhe unë punova me kontraktorin e sheshit për të mbyllur zorrët e hapura në mes të kryeqytetit që ishin bërë një makth për qytetarët me një kosto sa më të ulët. Natyrisht nuk përjashtoj që ai të ketë konkurruar dhe të ketë fituar tendera edhe kur kam qenë unë kryetar bashkie. Por s’kam bërë asnjë kullë; as me Fushën, as me kodrën, as me malin.”
Ne raport me reformën në drejtësi Basha ka sqaruar qëndrimin e opozitës për shkollën e magjistraturës. Sipas tij problemet sot burojnë nga fakti që nuk ka gjykatë kushtetuese, nuk është ngritur Këshilli i Lartë Gjyqësor dhe ai i Prokurorisë, nuk është ngritur as SPAKU e byroja kombëtare e hetimit.
“Do t’i zgjidhë këto probleme amendamenti për shkollën e magjistraturës? Sigurisht që jo, problem është shumë më i thellë. Problemi është që shtetit ligjor i kanë këputur të dyja duart dhe këmbët , këta në thonë vejani leukoplast. A zgjidhet problemi me leukoplast”?
Kreu i PD ka sqaruar edhe arsyet pse janë shtyrë zgjedhjet.
“Shtyrja nuk është ajo që dëshironim, por ajo që dëshironim më pak ishte që procesi të mos ishte gjithëpërfshirës. Duke qenë se partia u angazhua në një aksion politik shumë dimensional i cili në kuptimin kapilar kulmoi me protestën e 26 majit, realiteti i verës kampionatit, etj”.
Shtatori do të jetë një moment i rëndësishëm për PD, ajo duhet të realizojë zgjedhjet brenda partisë, të mbyllë reformën zgjedhore e te përgatitet për zgjedhjet lokale e nga ana tjetër të vazhdojë betejën kundër qeverisë.
