Demokratet jane mbledhur pa praninë e medias dhe pas dy ore debatesh kane vendosur te bllokojnë serish seancën plenare. Opozita ka zgjedhur këtë rruge përballje me mazhorancen pasi procesi i dekriminalizimit është bllokuar dhe sipas saj nuk ka reflektim nga shumica per çështjen e mandateve te 3 deputeteve socialiste, Kokedhima, Leskaj e Suli, si dhe per punën e komisioneve hetimore. Por konfliktualiteti politik duket se është acaruar me teper edhe nga memoja e përgatitur nga kuvendi qe nënvizon se vendimet per dekriminalizimin mund te kalojnë vetem ne formën e nje ligji e jo ne formën e akteve nënligjore.
“Situata është e jashtëzakonshme dhe po përkeqësohet nga ora në orë. Qytetarët shqiptarë duhet ta marrin vesh se Edi Rama jo vetëm refuzon që të pezullojë Armando Prengën nga punimet e Parlamentit, por tashmë ka depozituar në Kuvend një kërkesë ku refuzon kalimin e vendimit për zbatimin e ligjit për dekriminalizimin. Ai kërkon që ne në vend të zbatimit të këtij ligji sipas një vendimi që e përcakton vetë ligji në nenin 6 – pra ligji i dekriminalizimit në nenin 6, thotë që Parlamenti do të miratojë një vendim për të përcaktuar afatet, formularin e vetëdeklarimit etj – por tani deklaron se duhet një ligj tjetër për të zbatuar ligjin e dekriminalizimit.”
Dhe per liderin e opozitës, Lulzim Basha, kjo strategji e shumicës eshte nje loje per te bllokuar edhe reformën ne drejtësi, duke acaruar klimën politike ne vend.
“Pyetja shtrohet pse ky provokim?! Dhe pse tani kur Komisioni i Venecias ka sjellë opinionin e dytë për Reformën në Drejtësi. Kjo është një lojë perfide e Edi Ramës me anë të së cilës ai kërkon ti shpëtojë një Reforme në Drejtësi. Ai kërkon t’i shpëtojë Byrosë Kombëtare të Hetimit.”
Gjate mbledhjes me dyer te mbyllura Lulzim Basha është përballur edhe me kritikat e deputeteve te tij, te cilët kane kërkuar sqarime cfare do ndodhe pas seancës se te enjtes. Genc Ruli ka kërkuar qe ne kushtet ne te cilat ndodhet opozita te qartësohet se ne rast se do te këtë bojkot te behet siç duhet, e jo te hyje e te dale PD nga parlamenti për dy jave. Jozefina Topalli ka kërkuar vizion per ate qe do te ndodhe pas seancës se nesërme. Qartësi strategjie ka kërkuar edhe Majlinda Bregu, e cila ka vene ne dukje se nuk duhen aksione pa qëndrueshmëri si keto qe janë bere deri tani dhe se duhet qe njerëzit t’i besojnë Partisë Demokratike e jo vetëm ta dëgjojnë duke kritikuar. Bregu është distancuar edhe nga protesta e forumit te grave demokrate, duke e cilësuar nje degjenerim te aksionit opozitar. Edhe pse kryetari i PD Basha ka dale ne mbrojtje protestës, e cila sipas tij tregoi se cilat jane grate e vërteta qe përballen me Edi Ramen. Debati mes Bashes e Bregut ka vazhduar e mësohet se zonja Bregu i ka kujtuar kryetarit te Partisë se nuk ndodhet ne emisionet e Blendi Fevziut e Sokol Balles, por ne mbledhje grupi parlamentar.
