Ka shkuar në 15 numri i të vdekurve nga sulmi terrorist që përgjaku Barcelonën dy ditë më parë. Viktima është një djalë 7 vjeçar nga Britania, i cili u konsiderua i humbur. Julian Cadman ishte së bashku me nënën e tij gjatë momentit tragjik të sulmit me furgon. Mediat shkruajnë se nëna e të miturit ka humbur të dyja këmbët gjatë sulmit.
Autoritet spanjolle dhe europiane janë vënë në kërkim të shoferit 22 vjeçar, Junus Abujakub, shoferit të makinës që përplasi turmën ku mbetën më shumë se 100 të plagosur. Nëna e Abujakub e shoqëruar nga dhjetëra familjarë dhe të afërm të celulës terroriste, u mblodhën në sheshin Ripoll, duke I bërë thirrje djalit të saj të dorëzohet në polici. Ajo nuk beson se djali i saj ka qenë pjesë e ndonjë celule terroriste, madje hedh dyshimet se ai është manipuluar nga imami i Ripoll, në xhaminë që të rinjtë frekuentonin shpesh.
Nga ana tjetër, qeveria spanjolle ka deklaruar se celula terroriste që kreu sulmin në Barcelonë dhe planifikonin të kryenin një sulm më të madh në Kambrils, është shkatërruar plotësisht. Grupi përbëhej nga 12 persona, 5 prej të cilëve tashmë janë vrarë, ndërkohë janë gjetur trupat e të paktën tre personave të tjerë në një shtëpi që u përkiste terroristëve. Ata mendohet se janë vrarë pas shpërthimit në Alcanar, ku u gjetën 120 bombola gazi.
Ndërkohë, në Barcelonë vazhdon ende zia kombëtare. Familja mbretërore Filipi i 2 në Spanjë, mori pjesë në meshën “paqe dhe harmoni” të Bazilikës “Familia Sagrada” në Barcelonë këtë të diele, në përkujtim të viktimave të sulmit terrorist 2 ditë më parë. Qindra njerëz marshuan në sheshin Las Ramblas, për të treguar se nuk kanë frikë nga terroristët, dhe ndezën qirinj në përkujtim të viktimave.
