Barcelona turpëron Realin, 4 gola në “Bernabeu”

Një super Barcelonë për një super rezultat përballë skuadrës më të fortë të kampionatit. Katalanasit i dhanë një leksion të vërtetë futbollit Realit të Madridit në “El Clasico”, duke konfirmuar rritjen e vazhdueshme të ekipit në epokën Xavi. Një trajner që në vetëm pak muaj aventurë te klubi ku u rrit, po tregon vërtet gjëra shumë të bukura. Kështu ndodhi edhe në “Bernabeu”, aty ku blaugranat mposhtën 4 me 0 Realin falë një paraqitje spektakolare në sytë e Ancelotit, që në fund ngriti flamurin e bardhë dhe e pati të vështirë të justifikohet për mungesën e Benzema. Serinë e golave në këtë duel të madh të javës së 29 të La Ligës e hapi Obamejang në minutën e 29, i aftë për të shfrytëzuar një pasim të Dembele nga e djathta. Pastaj dyfishoi Arauho sërish me kokë në minutën e 38. Aktivizimi i Camavinges dhe Diaz në startin e të dytës nuk ndryshoi asgjë te madrilenët, të cilët pësojnë shumë shpejt edhe golin e tretë. Këtë herë një gol tipik alla Barcelona, spektakolar dhe finalizuar nga Ferran Torres. 5 minuta më vonë Obamejang kompleton feston dhe turpërimin madrilen para tifozëve të vet, ndonëse kreu i La Ligës nuk cënohet aspak, pasi Reali mbetet i pari me 9 pikë para Sevillës. Ndërsa Barcelona sulmon vendin e dytë tashmë dhe është vetëm 3 pikë larg andaluzëve.