Barcelona turpërohet në shtëpi nga Rayo Vallecano

Tjetër ndalesë, tjetër gabim i rëndë i Barcelonës në “Kamp Nou” në La Liga. Katalanasit u mposhtën 1 me 0 para publikut të tyre nga Rajo Vajekano në duelin e prapambetur që i takonte javës së 21 të kampionatit. Ndeshja u vendos që në fillim në minutën e 7 nga Garsia. Vendasit reagojnë duke dominuar ndeshjen, por nuk arrijnë dot të jenë të rrezikshëm në metrat e fundit, përtej formës së mirë të Dembele. Jo vetëm kaq por në fundin e këtij fraksioni, blaugranat janë të pafat sepse fillimisht Zhordi Alba godet shtyllën. Më pas i vjen radha Gavit të godasë traversën. Në pjesën e dytë Dembele dhe Traore ishin më të rrezikshmit të Barça, por goli nuk duket asgjëkund, madje vendasit rrezikuan të marrin golin e dytë kur Ciss goditi shtyllën. Me këtë humbje Barcelona ndan vendin e dytë me Sevijen dhe afron gjithnjë e më shumë Realin me titullin pasi diferenca është 15 pikë nga vendi i parë. Vajekano u konfirmua mace e zeze për Barcelonën, pasi e mundi edhe në fazën e parë dhe tani me 40 pikë skuadra e Iraoles siguron mbijetesën.