Gjithë viti 2016-të do të ketë një kërkesë të dobët e cila do të nxitë prirjet për inflacion të ulët. Në raportin e politikës monetare, Banka e Shqipërisë paralajmëron një rënie të konsumit, por ajo që është më thelbësore për ekonominë tonë është pasiguria që ka në tregjet ku ne eksportojmë, çka do të godasë direkt rritjen ekonomike.
Informacioni i ri ilustron rrezikun dhe pasiguritë që ka materializimi i këtij skenari. Në veçanti, ambienti i jashtëm shfaqet i përkeqësuar – si në drejtim të rritjes së eksporteve tona, ashtu edhe në drejtim të presioneve dezinflacioniste që burojnë prej tij – ndërsa besimi dhe klima e biznesit në ekonominë shqiptare vazhdojnë të mbeten të luhatshme.
Banka e Shqipërisë shprehet se mbajtja nën kontroll e buxhetit do të ndikojë negativisht në rritjen ekonomike pasi shpenzimet parashikohen të jenë të kontrolluara.
Konsumi publik pritet të mos mbështesë rritjen e ekonomisë, në përputhje me angazhimet për konsolidimin fiskal. Mbështetja nga kërkesa e huaj pritet të mungojë, në reflektim të parashikimeve për rritje të ulët në tregjet partnere dhe perspektivës jo të mirë të çmimeve ndërkombëtare të mallrave.
Pasiguritë e ekonomisë sonë shfaqen edhe në sektorin bankar. Ai po tregohet gjithnjë e më i kujdesshëm në kreditim, dhe ka rritur normat e interesit. Banka e Shqipërisë ka ulur në minimumin historik interesin e lekut, por kjo ka reflektuar vetëm te depozitat e qytetarëve.
