Kreu i Grupit Parlamentar të PS-së, Taulant Balla tha se presidenti Ilir Meta kishte hedhur vrer mbi Shqipërinë në takimin që zhvilloi me diplomatët.
Sipas tij, kreu I shtetit po përpiqet të dëmtojë vlerësimin që KE dha të hënën për Shqipërinë.
Balla tha këtë të enjte në seancën parlamentare se PD është një shtojcë e Metës, ndërsa theksoi se duhet të kenë një “qasje më të dashur ndaj vendit”.
“Kur bie fjala për rrugën evropiane të Shqipërisë ne duhet të jemi gjithmonë së bashku. Edhe Këshilli Kombëtar i Integrimit, nën drejtimin e opozitës, ka reflektuar këtë qasje pro-integruese. Bashkë me kolegët e opozitës parlamentare jemi ndjerë të trishtuar nga qasja që presidenti një orë para takimit me ne kishte pasur me katër krerët e diplomacive. A thua kishin takuar presidentin e një vendi kundërshtar me Shqipërinë. Një president që kishte hedhur vrer mbi Shqipërinë. Unë e kuptoj strategjinë politike të gjithkujt, por duhet të kemi qasje që shpreh dashuri për vendin tonë. Si me lloj-lloj letrash drejtuar presidentë apo kryeministra të vendeve të BE, Ilir Meta bashkë me ndonjë faktor tjetër të opozitës, e më vjen keq si përfundoi PD të jetë shtojcë e Metës, ka një përpjekje për të dëmtuar vlerësimin që dha KE të hënën dhe që ne mezi presim që më 26-27-28 mars të marrim një lajm pozitiv.
Sa i përket raportit të KE-së, numri dy i socialistëve vlerësoi se është dhënë në një moment të rëndësishëm të progresit evropian.
