Avokati Adriatik Lapaj shprehet se PS ka propozuar një formular që nuk i hap listat, por i mban të mbyllura.
I ftuar këtë të enjte në studion e lajmeve në “Vizion Plus”, Lapaj theksoi se listat plotësisht të hapura krijojnë flukse dhe nxjerrin sa më shumë qytetarë në zgjedhje. Por, sipas tij, fluksi i votuesve, është gjithmonë kundër pushtetit.
Për avokatin, hapja 100 për qind e listave krijon shans real për demokratizimin e brendshëm të partive.
“Propozimi që ka çuar mazhoranca në terma të gjuhes shqipe, quhet i hapur, por është i mbyllur. Mazhoranca ka propozuar një formular që nuk i hap listat, por i mban me renditje që bën kryetari i partisë. Në 99 për qind të rasteve, mbeten të mbyllura, sipas variantit të tyre. Hapja e listave i shërben frymës, nxjerr sa më shumë qytetarë në zgjedhje. Në listat e mbylluar ndodh që do të votojë dike tjetër, jo listën e kryetarit. Lista e hapur të jep një ofertë serioze politike dhe del e voton, i krijon mundësi opozitave që të kenë fluks në zgjedhje dhe fluksi gjithmonë është kundër pushtetit. Listat e hapura krijojnë probabilitet më të madh edhe brenda partive të vogla që të kenë një rezultat më pozitiv. Që 33 kandidatët e Tiranës të jenë në garë më njëri-tjetrin dhe asnjë mos të jetë paracaktues si fitues. Duke qenë të gjithë në garë, mund të bëjë 500 a 2000 vota dhe mund të arrijnë 1 a 2 mandate. Kjo iu intereson. Hapja e listave krijon shans real për demokratizimin/garë e brendshme të partive. Nuk e ka raportin me kryetarin drejtpërdrejtë, por me elektoratin. Thërret të mirët në betejë, jo servilët e partisë, thërret intelektualët. Nuk e vendos kryetari karrierën tënde, por sjellja jote me qytetarët. PS duhet patjetër t’i japë elektoratit mundësinë të zgjedhë. Nëse ato mendojnë se kjo është e drejta për ta, atëherë të pranojnë një sistem të dyfishtë. Partitë të zgjedhin vetë formulën. Nuk mund t’ua heq të drejtën partive të tjera që të kenë mundësinë që të shkojnë në listat e hapura.”
