Parlamenti grek ka miratuar mes tensionesh dhe protestash të dhunshme reformën e pensioneve mesnatën e të dielës. Ligjvënësit kanë votuar me 153 vota pro, paketën që parashikon shkurtime në shumën 3 miliardë euro deri në vitin 2019, ulje të ndihmave sociale dhe rritjen e moshës së pensionit në 67 vjeç. Por ndërsa ne kuvend shqyrtohej kjo pakete masash, jashtë parlamentit një grup tubuesish është përleshur me policinë. Protestuesit kanë hedhur bomba molotov mbi uniformat blu. Dhjetëra prej tyre janë arrestuar. Përshkallëzimi i protestës vjen në ditën e parë të demonstratave dhe grevave treditore te paralajmëruara. Miratimi i reformës së pensioneve në mesnatë erdhi pak para takimit të ministrave të eurogrupit, të cilët do të vlerësojnë progresin e bërë nga pala greke, për të lëvruar këstet e radhës së paketës prej 86 miliardë eurosh që vendi do marrë me qëllimin e tejkalimit të krizës ekonomike.
