Vullnet Muça, vëllai i Aleksandër Lahos, i njohur si Rrumi i Shijakut, dëshmoi në Gjykatën e Posaçme kundër Korrupsionit dhe Krimit të Organizuar (GJKKO), lidhur me atentatin e ndodhur në nëntor të vitit 2019 pranë mbikalimit të Shkozetit, ku mbeti i plagosur rëndë vëllai i tij.
Muça deklaroi se nuk ka njohje me të pandehurit në këtë çështje, përveç emrit të përmendur Plaurent (Dervishi), të cilin e njeh vetëm nga gojëdhënat si qytetar i Durrësit. Ai tha se në momentin e atentatit ndodhej në palestër dhe se ngjarjen e kishte parë përmes mediave.
“E pashë në televizor. Më vonë mora vesh se Aleksandri ndodhej në makinë me Arjan Ndojën dhe Andi Malokun. Sipas atyre që na thanë, ishte qëlluar nga mbrapa dhe një plumb e kishte goditur në kokë. Edhe sot është pothuajse invalid, nuk mban mend asgjë”, tha Muça.
Ai theksoi se familja nuk ka pasur konflikte me askënd dhe se është përpjekur të kuptojë se kush fshihej pas ngjarjes, por pa sukses. Sipas tij, informacionet më të detajuara për këtë i ka shteti.
“Kemi rënë viktimë edhe ne, edhe zotëria tjetër. Nga gojëdhënat flitet se ka qenë aktor i kësaj situate, por ne nuk kemi pasur interesa pasurore”, deklaroi Muça.
Vullnet Muça: Në 2019 kam jetuar në Sukth. Të pandehurit, nuk i njoh, kam dëgjuar si emër Plaurentin, se të dy nga Durrësi, por s’kam lidhje me të.
Aleksandër Lahon e kam vëlla. Në 2019 e kanë plagosur, e kam parë nga televizori, isha në palestër. Më mbrapa mora vesh që ka qenë në mjet me Andi Malokun, Arjan Ndojin. Po vinte nga rruga e plazhit.
Pasi shkova në spital na ra si bombë, se me këto palë nuk kemi pasur asnjë konflikt, pse u bë, qysh u bë. Sepse ai ka qenë shumë i aksidentuar, edhe sot është gati invalid. Ai thotë ‘na kanë gjuajtur nga mbrapa’ dhe një plumb e ka kapur në kokë, andaj ai s’mban mend asgjë’.
Doktorët thonë ka pësuar traumë. Jemi munduar të dimë të vërtetën, se me këta njerëz nuk kemi lidhje. Informacionet më të detajuara i ka shteti. Nuk mund ta di se nuk kemi pasur njeri më para. Kanë ardhur njerëz për vizitë.
Arjan Ndojën e kam takuar nja 2-3 herë. Ka thënë t’ia lëmë kohës, se nuk e dinim nga na kishte ardhur. Me familjen e Andi Malokut njihemi si bashkëfshatarë.
Vëllai ka pasur në përdorim një Benz të zi. Bashkim Malokun, Zamir Çyrben i njoh si komshi. I kam takuar si bisedë tavoline, si na erdhi, nga na erdhi.
/vizionplus.tv
