Presidenti i Venezuelës, Nicolas Maduro, i ka shpëtuar një atentati me dron të mbushur me eksploziv. Këto janë pamjet teksa presidenti është duke mbajtur një fjalim në një ceremoni ushtarake në Karakas, dhe papritur dëgjohet një shpërthim.
Pamjet tregojnë gjithashtu se si truprojat rreshtohen në mbrojtje te Maduros pas sulmit dhe më pas e largojnë nga podiumi.
7 ushtarë mbetën të plagosur si pasojë e sulmit. Autoritetet kanë vënë në pranga disa të dyshuar.
Atentati i dështuar ndaj Maduros ndodhi teksa ai ishte duke folur në podium, në kuadër të ceremonisë së 81 vjetorit të ushtrisë kombëtare. 2 dronë të mbushur me eksploziv shpërthyen shumë pranë podiumit.
Presidenti i Venezuelës, fajësoi Kolumbinë fqinje dhe disa elementë në Shtetet e Bashkuara për nxitjen e një “komploti” kundër tij. Por qeveria kolumbiane ka mohuar të jetë përfshirë në këtë sulm, duke thënë se “nuk ka baza” për pretendimet e Nikolas Maduro.
