Atentat me armë zjarri në Tiranë. Një 41-vjeçar i identifikuar si Devi Kasmi, humbi jetën pasi u qëllua disa herë me pistoletë nga një person i panjohur.
Ngjarja e rëndë ndodhi rreth orës 18.40 fare pranë spitalit të pediatrisë në QSUT.
Dëshmitarët i pohuan policisë se një person që ndodhej në një motor të madh, i kishte zënë pritë Kasmit në rrugicë, ku e qëlloi të paktën pesë herë me armë. 41-vjeçari humbi jetën menjëherë. Atentatori shfrytëzoi errësirën në vendin e ngjarjes duke u larguar me shpejtësi, pa u identifikuar. Për më tepër ai mbante në kokë edhe një skafandër.
Policia mbërriti me shpejtësi në vendin e krimit dhe mblodhi provat materiale. Përreth zonës u ngritën edhe postblloqe për kontrollin e personave të dyshuar.
Nga hetimet e para rezulton se viktima ka pasur probleme të mëhershme me ligjin, të cilat po verifikohen nëse bëhet fjalë për vrasje për hakmarrje.
