Ashpërsohet lufta SHBA-Kinë
Lufta tregtare mes SHBA-ve dhe Kinës sapo ka nisur. Administrata Trump ka publikuar një listë prej 1,300 produktesh Kineze, që do të jenë shënjestër e tarifave të reja, duke e përshkallëzuar më shumë tensionin mes dy vendeve.
Me vendosjen e taksave të reja, Shtetet e Bashkuara planifikojnë të aplikojnë tarifat në rreth 50 miliardë dollarë mallra për të ndëshkuar Pekinin. Në listën e re të produkteve kineze që do të taksohen janë pajisjet mjekësore, materialet kancelarike, etj.
Në një deklaratë për media, ambasada kineze në Shtetet e Bashkuara tha se Kina “e dënon me forcë dhe në mënyrë të vendosur listën e re, dhe se vendi do të marrë masa më të ashpra ndaj produkteve amerikane”.
Megjithatë, tarifat e reja të SHBA nuk do të hyjnë në fuqi menjëherë. Administrata do të mbajë një seancë publike për bizneset amerikane më 15 maj, dhe më pas do të vendosë zbatimin e tyre.
Lista e re për taksimin e 1300 produkteve kineze vjen një ditë pasi Kina ishte kundërpërgjigje vendimit të Trump, për vendosjen e tarifave të reja për çelikun dhe aluminin.
