Një tjetër rast i kultivimit të bimëve narkotike në Shkodër është evidentuar nga policia. Raportohet se janë asgjësuar 500 fidanë të dyshuar si kanabis, të cilat ishin mbjellur në një ambient të hapur, në fshatin Ashtë.
“Shërbimet e Komisariatit të Policisë Vau i Dejës, në bashkëpunim me specialistët e Seksionit për Hetimin e Narkotikëve të DVP Shkodër, si rezultat i kontrolleve me dron, të zhvilluara në kuadër të operacionit policor të koduar “Ashta”, kanë konstatuar në fshatin Ashtë, Shkodër, përgjatë bregut të lumit Drin, një ambient të hapur (pronë publike), ku ishin mbjellë në kubikë, rreth 500 fidanë të dyshuar narkotikë cannabis sativa”, njofton policia.
Një pjesë e vogël e fidanëve u sekuestrua në cilësinë e provës materiale, ndërsa pjesa tjetër u asgjësua me anë të djegies.
Materialet procedurale i kaluan Prokurorisë, për veprime të mëtejshme.
