Kryeministri i Shqipërisë, Edi Rama, ka marrë pjesë në Konferencën e 3-të Kombëtare të Arsimit dhe Formimit Profesional, ku janë diskutuar rezultatet e reformës në këtë sektor dhe vizioni “Aftësi 2030” për zhvillimin e aftësive, rritjen e punësimit dhe forcimin e konkurrueshmërisë së ekonomisë shqiptare.
Në fjalën e tij, Rama vlerësoi ecurinë e deritanishme të arsimit profesional në vend, duke theksuar ndryshimet e ndodhura ndër vite dhe rritjen e interesit të të rinjve për këtë drejtim. Ai gjithashtu u ndal te situata aktuale e sistemit, si dhe objektivat e qeverisë për të rritur më tej pjesëmarrjen e nxënësve në arsimin profesional në vitet e ardhshme.
Rama: Është një ditë e rëndësishme për të folur se çfarë kemi bërë por mbi të gjitha se çfarë duam të bëjmë në rrugëtimin strategjik për punësimin. Është në ditë kur 3500 maturantë të arsimit profesional kanë sot provime, dua tu uroj suksese. Është një ditë kur bilanci është goxha domethënës dhe është shumë ikurajues. Kur ne e kemi nisur këtë rrugë kemi pasur një sistem të arsimit profesional të degraduar dhe të padobishëm për të rejat dhe të rinjtë që shkonin në shkollat e arsimit profesional për të mos mbetur pa asnjë mundësi tjetër. Por nuk gjenin aty asnjë kusht për të zhvilluar talentin dhe për të marrë zanatin e tyre. Gjenin disa mësues që e kishin të pamundur të bënin mësimin tërheqës pasi nuk kishte kushte minimale infrastrukture, nuk kishte laboratorë, nuk kishte asnjë lidhje mes arsimit profesional dhe tregat.
Sot situata është krejt ndryshe. Nëse në fillim të këtij rrugëtimi nxënësit që shkonin në dyert e arsimit profesional ishin pak më shumë se 10%, sot janë 20%. Kjo është një fazë dhe nuk është mbërritja. Synimi ynë është që të kemi 1 në 3 nxënës në arsimin profesional. Sot jemi në kushtet kur arsimi profesional është një zgjedhje. Kemi një shifër që jo vetëm flet për këtë ndryshim, por dhe inkurajon të tjerë që të kthejnë sytë nga arsimi profesional. 63% e atyre që mbarojnë arsimin profesional punësohen. Një pjesë e tyre fillojnë punojnë që më parë, falë reformës që kemi bërë.
