Policia e Tiranës ka arrestuar një 43-vjeçar në fshatin Bërxullë, pasi gjatë kontrollit të banesës së tij u gjet një armë zjarri pistoletë me municion, të cilën e mbante pa leje.
Sipas njoftimit zyrtar të policisë, operacioni u zhvillua në kuadër të kontrolleve të koduara “Risku”, ku efektivët ushtruan kontroll në banesën e shtetasit Juljan Koni, 43 vjeç. Gjatë kontrollit, shërbimet e Policisë gjetën dhe sekuestruan një pistoletë, një krehër dhe 7 fishekë.
Arrestimi i Konit është bërë pas kontrolleve të zhvilluara nga policia gjatë mbrëmjes së djeshme në zonën e Bërxullës, pas vrasjes së 50-vjeçarit Edmond Sula.
Megjithatë, deri në këto momente, policia nuk ka evidentuar ndonjë lidhje mes armës së sekuestruar te Juljan Konit dhe vrasjes së Edmond Sulës. Hetimet dhe verifikimet për zbardhjen e plotë të rrethanave vijojnë.
