Arratisja spektakolare e Altin Ndocit nga spitali i Durrësit ishte një nga temat e diskutimit mbrëmjen e kësaj të marte në studion e “Quo Vadis”, të moderatores Pranvera Borakaj në Vizion Plus.
I ftuar në studio, analisti Indrit Vokshi tha se ajo që shohim sot është simptomë e gjithë asaj që po ndodh në shoqërinë shqiptare. Sipas tij, sot shoqëria shqiptare është e “dashuruar” me të fortët, kriminelët dhe përbuz intelektualët dhe profesionet e ndershme.
Vokshi tha se lidhjet e krimit me politikën dhe me policinë janë pasoja të rënda për shoqërinë.
Pjesë nga biseda:
Borakaj: Si e ke parë ngjarjen?
Vokshi: Ne po e trajtojmë si një veprim normal. Ky nuk është rast i izoluar. Është një simptomë e gjithë asaj që kemi parë në TV. Polici që dalin në Sky, krimi i lidhur me politikanë. Kjo është e qartë se janë blerë nga brenda oficerë të shtetit. Janë blerë nga brenda, pasi shteti shqiptar është shumë i kontaminuar dhe nuk dihet kujt i shërbejnë: shtetit apo krimit. Ta ka thënë shefi i SPAK-ut që këtu na dalin në hetime oficerë të policisë. E ka thënë shefi i SHISH-it në debatin me ministrin: “Çfarë materialesh të të sjell unë ty, ku në çdo dosje del oficer policie?”. Kjo është simptoma. Madje u numëronin edhe rrënjët e hashashit me dron. Ka komizëm dhe skema në këtë pikë. Kjo është një simptomë e një shteti të kontaminuar, ku nuk kuptohet nëse janë policë apo njerëz të krimit. Kjo që doli tani, p.sh. rasti i AKSHI-t, pasi ata rrezikuan gjithë shërbimin e policisë, duke rrezikuar taksa dhe prona. Kjo e sotmja është simptomë, është sëmundje e madhe e këtij shteti. Një përqindje e lartë e shoqërisë ka simpati për këta të fortët.
Borakaj: Simpati apo nuk kanë çfarë të bëjnë?
Vokshi: Ka hyrë një kulturë te brezi i ri për këta njerëz, një kulturë e antiligjit. Këta kanë legjitimitet popullor. Bëj një sondazh dhe pyeti qytetarët se çfarë mendojnë. Hapni TikTok dhe këta që ne i quajmë të rrezikshëm, shumë thonë që janë djem të mirë. Një pjesë e rinisë thonë: “Djalë i mirë, e ruajtë Zoti”.
Borakaj: E kemi fajin ne?
Vokshi: Ka problem shtetëror dhe problem social. Çfarë shembulli social ka sot? Është mësuesi, për të cilin thonë se është gjynah? Cili është shembulli dhe modeli i sotëm? Është shteti i kontaminuar dhe i korruptuar, është edhe rrënimi i kulturës dhe arsimit. I forti ka më shumë vlerë se një mësues, se polici apo ushtaraku.
