Drejtoria Hetimore Qendrore pranë Deparatamentit të Policisë Kriminale ka finalizuar operacionin policor “Papër”, nga ku goditi një rast të trafikimit të armëve luftarake dhe lëndëve eksplozive .
Operacioni u zhvillua në bashkëpunim me Drejtorinë Vendore të Policisë Elbasan dhe Drejtorinë e Forcës së Posaçme Operacionale në Policinë e Shtetit, në rrugën nacionale Elbasan -Peqin, ku u arrestua shtetasi Y. A., 51 vjeç, lindur në Kacandoll dhe banues ne Podujevë, Kosovë.
51 vjeçari u kap në flagrancë nga policia duke transportuar me automjetin e tij armë luftarake, municion dhe lëndë shpërthyese TNT, të cilat i siguronte në Serbi e në vende të tjera, më pas i transportonte në Kosovë me destinacion final Shqipërinë.
Armët dhe municionet ishin fshehur në vende të posaçme të krijuara në automjetin e tij, si në motor, kabinë, bagazh e kroskot.
Policia sekuestroi në cilësinë e provës materiale 19 armë zjarri të llojit pistoletë, të markave të ndryshme, 400 fishekë luftarak, 4 kallëpe lënde eksplozive të llojit TNT, me peshë të përgjithshme 1.6 kg, 3 telefona dhe automjetin që transportonte armët.
Ndërkohë vijon puna me Prokurorinë e Krimeve të Rënda për dokumentimin e plotë të këtij aktiviteti kriminal, identifikimin e personave që kanë bashkëpunuar me personin e arrestuar, pasi nga veprimet e deritanishme proaktive rezulton se ky shtetas ka shitur edhe më parë armë luftarake, në Kosovë , Shqipëri e vende të tjera.
