Ardi Asllani hap dyert e “Shqipërisë së tij” në Hollywood

Ishte surprizë për të gjithë koleksioni i ri i Ardi Asllanit, i cili do të prezantohet sot në një nga studiot më prestigjoze të modës Amerikane. Por ja që Ardi është njeri i surprizave dhe si i tillë, bujën e la ta bënte me vepra dhe jo me fjalë.

Kur lajmi për koleksionin “My Albania” mori dhenë në Shqipëri vetëm dy ditë më parë, sot është momenti i shumëpritur për të parë qytetet shqiptare, të stampuara në veshjet të cilat do të mbajnë modelet gjatë prezantimit të koleksionit.

Në një nga studiot më të njohura të Hollywood, “NY Kaufman Studios” stilisti Ardi Asllani do të prezantojë koleksionin e tij “My Albania”.

Ai ka treguar se sfilata do të hapet dhe do të mbyllet nga dy emra shqiptarë, modele të cilat po kërkojnë famën në SHBA. Xhesika Berberi dhe Arselajda Buraku do të jenë gurët e suksesit të sfilatës, duke u shoqëruar nga të tjera modele.

Siç është bërë e ditur, veshjet të cilat do të prezantohen, do të përmbajnë imazhe të qyteteve shqiptare, të cilat të plotësuara mbi tekstil, sjellin një risi për këtë teknike pune mjaft të njohur në botë, por pak të parë në Shqipëri. Ardi guxon me profesionalizëm ta sjellë.

Të ftuarit? Sigurisht që janë personazhe të rëndësishëm të modës amerikane, shqiptarë të Amerikës dhe jo vetëm. Trupat diplomatike të shteteve shqiptare do të jenë prezent në sfilatën e stilistit.

Muzika e përzgjedhur me kujdes do të jetë “Ethnic Jazz” me motivet e kabasë së Përmetit. Gjithçka është e detajuar dhe e organizuar me kujdes nga Ardi Asllani, që me këtë rikthim të bujshëm do të mbetet gjatë në memorien e modës shqiptare dhe jo vetëm.