7 figura të rëndësishme të Partisë Demokratike kanë kërkuar sot largimin e Lulzim Bashës dhe reformimin e Partisë Demokratike pas humbjes së zgjedhjeve të 25 prillit.
Demokratët kanë argumentuar se Lulzim Basha është përgjegjës për këtë humbje, duke listuar mes gabimeve kryesore braktisjen e reformës territoriale, djegien e mandateve e bojkotin e zgjedhjeve lokale.
EDIT HARXHI
ISH-ANETARE E KRYESISE, PD
“Ne jemi të vetëdijshëm që përgjegjësia e zgjedhjeve i takon drejtuesve të Partisë. Ata duhet të marrin përgjegjësi për humbjen, pasi kanë shembullin e zotit Berisha. Dorëheqja e parevokueshme e Lulzim Bashës nga partia nuk është fundi i PD-së por fillimi i ringritjes së saj.”
Kryetari i Këshillit Kombëtar, Bujar Nishani ka deklaruar se Basha përsëriti të njëjtat gabime si në vitin 2017, duke hartuar i vetëm listën e kandidatëve për deputet e duke zeruar punën e komisionit për përzgjedhjen e kandidateve, pjesë e të cilit ishte edhe ai.
BUJAR NISHANI
KRYETAR I KESHILLIT KOMBETAR, PD
“Puna e Komisionit u hodh në kosh, nuk u morr parasysh, ndonëse anëtarët dhe vendimit ishin me akte nga Kryesia, dhe kjo punë u hodh poshtë dhe qytetarët janë ndikuar, që edhe për një proces që mund të ishte pozitiv, për hir të interesave të një njeriu”
Por deklaratën më të ashpër e artikuloi Arben Imami, një prej themeluesve të Partisë Demokratike i cili u pozicionua kundër një koalicioni me Partinë Socialiste të Edi Ramës
ARBEN IMAMI
THEMELUES I PD
“Po i them Lulzim Bashës se do të jetë vrima e miut 500 grosh nëse mendon që në koalicion me PS, me zgjatje jo u vodhën votat, jo do futem e jo s’do futem në Parlament, do t’i futet një fushate. E vetmja rrugë e ndershme është dorëheqja që i shërben partisë, përndryshe do të ketë ndeshje serioze.”
11 ditë pas humbjes së zgjedhjeve zërat për dorëheqjen e Lulzim Bashës janë shtuar, por vetë kryetari i PD Basha nuk ka bërë asnjë koment për të ardhmen e tij politike e nuk ka folur në asnjë rast për dorëheqje.
