“Sundimi i ligjit, të drejtat e njeriut, demokracia në Kosovë janë jo vetëm më të mirat në rajon, por edhe më të mira se në disa vende anëtare të Këshillit të Evropës”.
Kështu është shprehur kryeministri i Kosoves Albin Kurti gjate nje interviste te dhene per DW. Duke folur per asociacionin kreu i qeverisë së Kosovës ka përsëritur se gjithçka duhet të jetë në përputhje me Kushtetutën.
“Ne dëshirojmë të eliminojmë disa skepticizma që mund të ekzistojnë deri në mes të muajit maj, por jemi në të drejtën tonë. Mos të harrojmë se Kushtetuta e Republikës së Kosovës ofron të drejta të gjera për pakicat, e në veçanti për atë serbe. Dhe nuk e mohojmë që paraardhësit tanë kanë bërë një marrëveshje për asociacionin e komunave serbe, por gjithçka duhet të jetë në përputhje me ligjshmërinë, kushtetutshmërinë, interesin publik të republikës dhe në mbrojtje të të drejtave të qytetarëve serbë”, tha Kurti.
Kurti është shprehur optimist për antarësimin e Kosovës në Këshillin e Evropes
“Sipas renditjes së organizatave prestigjioze ndërkombëtare ne kemi bërë progres. Kësaj i shtojmë edhe faktin që kemi kaluar me sukses në mbledhjen e ambasadorëve më 24 prill të vitit të kaluar dhe mbledhjen e parlamentarëve më 16 prill të këtij viti, dhe raporti nuk ka parashikuar parakushte apo kushte që nuk i kemi plotësuar. Unë jam optimist edhe për mbledhjen e Këshillit të Ministrave të Këshillit të Evropës në mes të muajit maj për anëtarësimin e Republikës së Kosovës në Këshillin e Evropës”, tha Kurti.
Kurti u shpreh i habitur me raportin e fundit të DASH.
“Natyrisht që ka edhe kritika për ne, por nëse shikoni raportin e vitit 2019 sot Kosova ka progres të jashtëzakonshëm dhe ajo që mua më çudit është që në raportin e Departamentit Amerikan të Shtetit nuk citohet për shembull ‘Freedom House’, nuk citohet ‘Transparency International’ dhe po të citoheshin do të duhej të lëvdohej Kosova”, tha kreu i qeverisë.
Përsa i përket vendimit të Bankës Qendrore të Kosovës, Kurti deklaroi se qeveria e mbështet plotësisht këtë rregullore, ndërsa theksoi se palët po dialogojnë në Bruksel dhe sipas tij janë në rrugën e duhur për zgjidhjen e çështjes së dinarit./vizionplus.tv
