Pas Barcelonës dhe Amsterdamit, rreth 6,000 të rinj të moshës 18 deri 20-vjeç u bënë pjesë e një eksperimenti shëndetësor në Liverpul. Të rinjtë kërcyen për orë të tëra në një klub nate, pa qenë të detyruar të mbajnë maska apo distancë fizike. Kushti për të qenë të pranishëm në event ishte përgjigja negative për koronavirus në 24 orët e fundit.
Testi dy-ditor është pjesë e një skeme pilot për të parë se si më shumë vende mund të rihapen në mënyrë të sigurt. Përveç koncertit, do të mbahet edhe një ndeshje futbolli në stadiumin Wembley të Londrës ku do të marrin pjesë rreth 8,000 njerëz.
Pas një fushate të suksesshme vaksinimi, më 12 Prill Mbretëria e Bashkuar filloi me lehtësimin e masave. Kryeministri Boris Johnson ka premtuar heqjen totale të kufizimeve në muajin qershor.
Nga ana tjetër, organizata botërore e shëndetësisë ka autorizuar përdorimin urgjent të vaksinës Moderna kundër COVID-19, e pesta që miratohet nga organi ndërkombëtar për përdorim të tillë. Në fund të javës së ardhshme pritet vendimi për vaksinat kineze Sinopharm dhe Sinovac.
