Deputeti i Bindjes Demokratike, Andi Përmeti deklaroi se bisedimet për bashkëpunim me partinë e Jozefina Topallit, por edhe me parti të tjera vijojnë. Gjatë një interviste për edicionin qendror të lajmeve në “Vizion Plus”, Përmeti tha se Bindja Demokratike është e hapur për këdo që premton ndryshimin. Ai shtoi se qytetarët do t’i besojnë partisë së Astrit Patozit pikërisht për të nisur ndryshimin.
“Bisedimet janë në momentet e fundit, më shumë sesa dy emra partish, ne kemi deklaruar që jemi të hapur për të bashkëpunuar me këdo që ka qëllime njësoj si ne. Që është kundër tre kryetarëve dhe gjithkush të pranojë kandidimin me lista 100% të hapura, ne jemi e vetmja parti që kemi deklaruar që do të jemi me lista 100% të hapura. Ne jemi në tratativa dhe këto janë diskutime, por kjo nuk përbën ndonjë rëndësi të madhe sot sesa pikat themelore që ne u ofrojmë qytetarëve. Diskutimet kanë afat akoma deri më 24 shkurt. Deri në momentin e fundit ne do të jemi të hapur për të diskutuar. Ne nuk kemi bërë thirrje për të rrëzuar tre kryetarët sepse është pak e vështirë të rrëzosh ata me një goditje. Ne kemi bërë thirrje të na besojnë për të filluar ndryshimin. Ndryshimi nuk vjen në një ditë, por do një pikënisje. Pikënisja do të jetë më 25 prill.”
Andi Përmeti u shpreh i sigurt për “Vizion Plus” se Bindja Demokratike do të sigurojë mandate në çdo qark më 25 prill.
“Pretendojmë të marrim mandate në çdo qark të Shqipërisë, më shumë se 2 mandate në Tiranë dhe më shumë se një mandat në Korçë.”
Këtë të premte u regjistruan në KQZ për zgjedhjet Bindja Demokratike e Astrit Patozit, Lëvizja për Ndryshim e Jozefina Topallit dhe Lëvizja Demokratike Shqiptare e Myslim Murrizit.
