Masat ishin super sa i takon sigurisë, por jo aq sa për të shpëtuar atë që mund të cilësohet si Shqipëria më e dobët e epokës ‘De Biazi’, duke i bërë mbyllje të shëmtuar një viti që ka hyrë në historinë e futbollit shqiptar. Ndeshja ndaj Izraelit në “Elbasan Arena”, ajo që duhet të jepte hovin për vendin e 3-të, rezultoi një harakiri për kuqezinjtë. Aspak ide e fantazi, por sidomos gabime trashanike si ato të Gjimshtit e Berishës. Që si pasojë sollën pesimin e 3 golave, aq sa kishim vite që nuk i provonim në fushën tonë. Në total bëjnë 5 në 2 ndeshje të luajtura në shtëpi, teksa në dy të parat kishim pësuar vetëm 1. Natyrisht, kundërshtarët kanë pasur diferencë, por një shpërfytyrim i tillë ishte vështirë i parashikueshëm për të besuarit e De Biazit. Në një gjendje të tillë nuk mbahej mend kur kishim qenë për herë të fundit. Kaq shumë s’e kishin nxjerrë topin nga rrjeta as në Europian, ku 3 gola gjithsej pësuam prej ekipeve mbi nivelin mestar, siç janë Zvicra e Franca.  Pavarësisht se edhe gjyqtari turko-gjerman, Deniz Aytekin bëri të vetën në një mënyrë a në një tjetër, e pajustifikueshme ishte veçanërisht çmenduria e Etrit Berishës. Portieri, i cili me atë veprim hodhi në erë jo vetëm shanset e vakta për një barazim të mundshëm, por edhe gjithçka të mirë që po flitet për të gjatë kësaj periudhe. Tashmë, kuqezinjtë shohin t’i largohet 3 pikë vendi i tretë në grup, që konsiderohej si objektiv minimal për t’u arritur. Por që është bërë mision gati i pamundur, duke ditur që menjëherë në mars na pret Italia. Mirëpo, mbi të gjitha është vendosur në dyshim qendrimi i De Biazit, sa që përflitet se ajo që ndodhi me Izraelin ishte pjesë e një skenari për ta larguar. / Tring sport

Leave a Reply

Your email address will not be published.