Ministri i Mjedisit, Blendi Klosi reagoi për operacionin policor të enjten mbrëma, ku u arrestuan gjashtë persona sepse do të fusnin amiant në Shqipëri. Nga Prespa, Klosi deklaroi se mbetjet e rrezikshme janë dërguar në laboratorë për t’u verifikuar. Ai shtoi se po hetohet edhe nëse ka patur raste të tjera kriminale.
“Është një ngjarje e ditës së parë apo ka raste të tjera për të cilat do të hetohet dhe hetimi do të shkojë thellësisht në gjithë aktivitetin për mua shumë kriminal që ka zhvilluar ajo kompani, megjithate do ia lëmë hetimit fjalën e fundit dhe laboratorëve shkencorë që të vërtetojnë përbërjen e atij materiali dhe rrezikshmërinë që ai ofron për njerëzit por ndihem mirë që patëm një kombinim të jashtëzakonshëm me Policinë e Shtetit dhe në kuadër të reformimit të institucioneve që kontrollojnë mjedisin në Shqipëri pasi mbrojtja e mjedisit është bërë detyrë e gjithë shoqërisë dhe njerëzit kanë shumë në dorë. Informacioni erdhi nga qytetarë dhe u veprua nga institucione shtetërore.
Klosi kërkoi nga qytetarët që nëse kanë dijeni për raste të tjera të futjes së mbetjeve të rrezikshme në vendin tonë, të njoftojnë menjëherë autoritetet.
Gjashtë persona u arrestuan të enjten nga Policia e Vlorës sepse u kapën në tentativë për të futur përmes tragetit mbetje të rrezikshme.
