Një amanet i lënë vetëm pak ditë para ndarjes nga jeta nuk u lejoi familjarëve të aktorit të njohur korçar Koço Qëndro ta përcillnin atë me homazhe në hollin e Teatrit “Andon Zako Çajupi”, skenë ku ai kaloi pjesën më të madhe të jetës artistike.
Sipas familjarëve, vetëm një javë para se të ndërronte jetë, Qëndro i kishte kërkuar njërit prej djemve të tij që trupi i tij të mos vendosej për homazhe në teatër. Amaneti u respektua nga të tre djemtë, të cilët vendosën ta zbatonin dëshirën e fundit të të atit.
Për dekada me radhë, Koço Qëndro ishte një nga figurat më të spikatura të Teatrit “Andon Zako Çajupi”, duke interpretuar dhjetëra role që kanë mbetur në kujtesën e publikut. Një ndër më të njohurit ishte Harpagoni në komedinë “Kopraci”, rol që ai e riktheu në skenë edhe në moshën 93-vjeçare, duke dëshmuarl pasionin dhe përkushtimin e tij të jashtëzakonshëm ndaj artit.
Aktori nuk e bëri kurrë publik arsyen e këtij amaneti. Megjithatë, duke iu referuar intervistave të tij ndër vite, mendohet se ky vendim lidhej edhe me zhgënjimin për mungesën e vlerësimit institucional, pasi ai kishte shprehur publikisht pakënaqësinë për faktin se nuk përfitonte një pension të veçantë, pavarësisht kontributit të jashtëzakonshëm në artin shqiptar.
Lamtumira e fundit për mjeshtrin e skenës do të zhvillohet në një prej agjencive funerale të qytetit të Korçës, ku familjarë, miq, kolegë dhe artdashës do t’i japin nderimet e tyre të fundit.
