Opozita akuzon Ministrin e Brendshëm Saimir Tahiri, se ka lene pa mbrojtje dëshmitarin e drejtësisë ne gjyqin kundër Aldo Bares. Madje atij i kane refuzuar edhe regjistrimin e vajzës ne shkolle.
Deklarata e plote e Enkelejd Alibeaj:
Denoncimi në media i Arben Kices, që bëri të mundur dënimin e bandës së Lushnjes që solli drejtësi për krimet çnjerëzore të Aldo Bares, është tronditës dhe tregon se si ai trajtohet si armik nga çdo hallkë e shtetit.
Në vend se dëshmitari i drejtësisë të gëzonte privilegje, sipas ligjit, ai jo vetëm është lënë në mes të katër rrugëve, pa mbrojtje e pa mbështetje, por lufta e qeverisë ndaj tij shkon deri aty sa ai nuk regjistron dot as vajzën në shkollë.
Ky rast skandaloz tregon fytyrën e vërtetë të qeverisë, të Edi Ramës e Tahirit të tij, që bëjnë lloj-lloj paktesh me krimin, i ofrojnë lehtësi bandave e trafikantëve, dhe nga ana tjetër i nxijnë jetën një dëshmitari drejtësie.
Ky është modeli dhe ideja që Edi Rama ka për drejtësinë.
Kjo është një tradhëti që i bëhet shtetit, parimeve të tij, drejtësisë dhe një favor ndaj bandës së Aldo Bares.
Partia Demokratike i bën thirrje zyrave përgjegjëse të ofrojnë shërbimet që dëshmitarit i takojnë me ligj, e të mos bëhen pjesë e kësaj skeme kriminale të ndëshkimit të dëshmitarit dhe familjes së tij.
