Eksperti i marrëdhënieve ndërkombëtare, Ilir Aliaj, ka hedhur poshtë krahasimet mes Venezuelës dhe Shqipërisë.
Ai tha se për Venezuelën, SHBA e ka bërë të qartë prej kohësh qëndrimin, duke i cilësuar grupet narkotike si terroriste, ndërsa për vendet e Ballkanit ka nxjerrë një ligj të veçantë.
Sipas tij, në ligjin amerikan është e qartë që nuk hiqen “non-grata”-t; madje, për Ballkanin do të ketë edhe “non-grata” të tjera.
Pjesë nga biseda:
Aliaj: Që në fushatën elektorale, presidenti Trump ka thënë që do të jetë presidenti i paqes dhe kështu vazhdoi deri në disa momente të caktuara, pasi nuk është vetëm Venezuela. Rasti i Venezuelës, në gjykimin tim, sepse unë shoh që edhe në Shqipëri ka shumë që pretendojnë se ishte thyerje e sovranitetit. Amerikanët atë ditë thanë se ky ishte operacion i forcave të policisë, i mbështetur nga forcat ushtarake. DEA është mbështetur në operacion nga forcat e ushtrisë. Në konferencën për shtyp atë ditë, Trump dhe Rubio thanë se operacioni është i forcave të policisë, i mbështetur nga ushtria. Në Venezuelë janë dy grupe që marrin kokainë në Kolumbi dhe e përcjellin në SHBA. Disa herë Trump ka thënë që narkotrafikantët janë grupe terroriste.
Borakaj: Dhe ambasadorja e SHBA-së në Tiranë e vendos theksin te narkotikët.
Aliaj: Në Shqipëri u bënë zgjedhjet e 11 majit dhe nuk kemi një përshëndetje për qeverinë, por përshëndetje për popullin shqiptar. Çuditërisht, edhe pas shumë ngjarjeve që kanë ndodhur në Kosovë me qeverinë e Albin Kurtit, qeveria amerikane e përshëndet qeverinë e Albin Kurtit dhe i thotë se është e hapur për bashkëpunim me ju. Në fund të muajit dhjetor, Kongresi amerikan ka kaluar një ligj të posaçëm për Ballkanin Perëndimor. Çfarë thotë ky ligj? I heq të gjitha mundësitë për të hequr “non-grata”-t. Ka një nen aty ku thuhet se “non-grata”-t hiqen vetëm për raste humanitare, pra nëse një person është i sëmurë dhe kjo sëmundje mund të shërohet në SHBA.
Borakaj: Do të ketë “non-grata” të tjera?
Aliaj: Sigurisht që po, dhe Shqipëria nuk përjashtohet. Në ligjin e SHBA-së thuhet se do të vijojë lufta ndaj autoritarizmave, trafikëve dhe karteleve.
Borakaj: Asnjëra nuk ka lidhje me ne?
Aliaj: Jo, s’ka, por unë s’e di pse amerikanët janë “çmendur”, pasi asnjë nga këto nuk është as te ne, as në ndonjë vend të Ballkanit.
