Partia Demokratike dhe 25 forca të tjera politike kanë krijuar “Aleancën për Shqipërinë madhështore” me të cilën do të garojnë në zgjedhjet parlamentare të 11 majit.
Negociatat zgjaten deri mesnatën e 3 marsit dhe i fundit që firmosi marrëveshjen ishte kryetari i PDIU, Shpetim Idrizi. Sipas marrëveshjes mes Partisë Demokratike dhe aleatëve; Partia e Lirisë e drejtuar nga Ilir Meta do të ketë 4 kandidatë në pjesën e sigurt të koalicionit; Fatmir Mediu, Angron Duka, Vangjel Dule e Shpëtim Idrizi.
Për të gjithë demokratët që janë skeptikë ndaj partive aleate; Sali Berisha theksoi se këto forca politike kanë votat e veta dhe elektoratin e vet.
“Një koalicion shumë i mirë u bë, natyrisht në këtë koalicion vërtet PD ka dhënë 8 vende në listat e garantuara, por demokratët dhe mbështetësit tanë duhet ta dinë se këto 26 parti në tërësinë e tyre përfaqësojnë herë-herë edhe një të tretën e elektoratit shqiptar”, tha Berisha.
Para gazetarëve, Berisha theksoi se qëllimi i PD ishte të krijohej një koalicion sa më i madh kundër qeverisë Rama duke përfshirë çdo parti pavarësisht mbështetjes në elektorat
“Pavarësisht se të marra veçmas janë parti modeste në votat e tyre, por të marra së bashku kanë një elektorat qindra mijëra votash. Dhe unë u them se kjo është një fitore e vërtetë e aleancës për Shqipërinë Madhështore”, tha ai.
Në koalicionin prej 26 partish janë aleatët tradicionale dhe Partia Republikane; janë forcat politike me të cilat PD ka bërë betejë në 12 vitet e fundit si Partia e Lirisë, Partia Agrare, Partia Bashkimi për të Drejtat e Njeriut.
Por në koalicionin e PD janë përfshirë edhe kryetar të partive që kryesisht janë bërë të njohur në 2019 kur morën mandatet që la Partia Demokratike; si Kujtim Gjuzi, Selami Jenishehri e Kostaq Papa.
/vizionplus.tv
