Prishtina zyrtare akuzon Beogradin për spastrim etnik me metoda administrative, pasi i ka mohuar të drejtën e votës rreth 6 mijë shqiptarëve në Luginën e Preshevës përmes asaj që quhet “pasivizim i adresës”.
Kryeministri Albin Kurti ka deklaruar se ky është një nga faktorët që ka ndikuar në përfaqësimin e dobët të shqiptarëve në parlamentin serb, ku tashmë nga tre kanë vetëm një deputet.
ALBIN KURTI
KRYEMINISTER I KOSOVËS
“Shqiptarëve në Preshevë, Medvegjë dhe Bujanoc iu është bërë një padrejtësi e madhe, meqenëse rreth 6 mijë vetave atje u janë pasivizuar adresat, duke i diskriminuar mbi baza kombëtare. Po ndodh një lloj spastrimi etnik, administrativ e burokratik, i heshtur e i ftohtë, por megjithatë me pasoja shumë të rënda, dhe unë besoj që rezultati jo i kënaqshëm i këtyre zgjedhjeve për shqiptarët në Preshevë, Medvegjë e Bujanoc vjen edhe për shkak të këtij lloj spastrimi të heshtur që po iu bëhet atyre atje, me metoda joluftarake kësaj radhe, por administrative e burokratike.”
Komiteti i Helsinkit për të drejtat e njeriut në Serbi ka deklaruar se Beogradi po heq të drejtën e votës banorëve shqiptarë që jetojnë jashtë Serbisë, qoftë në Evropën Perëndimore apo në Kosovë, në mënyrë që të ulë sa më shumë që të mundet numrin e shqiptarëve në jug të shtetit.
RAPORT I KOMITETIT TË HELSINKIT
“Kjo masë, në thelb, është një formë e spastrimit etnik përmes mjeteve administrative. Kur adresa e përhershme e banimit “pasivizohet” dhe hiqet nga libri amzë në Serbi, qytetari humbet të drejtën që të rinovojë letërnjoftimin ose pasaportën e skaduar, të regjistrojë makinën, të ketë qasje në kujdesin shëndetësor ose shërbime sociale, të blejë ose shesë prona, apo të votojë në zgjedhjet lokale dhe ato të përgjithshme.”
Sipas Ligjit për Vendbanim dhe Vendqëndrim në Serbi, “pasivizimi i adresës tregon se shtetasi nuk jeton në adresën e vendbanimit të përhershëm ose të përkohshëm të regjistruar”.
