Lëvizja Vetëvendosje mban zgjedhjet për kryetar, pas krizës së thellë që ka përfshirë këtë subjekt politik që nga formimi i tij. Kandidati i vetëm për kryetar, Albin Kurti, ka prezantuar platformën para anëtareve dhe aktivistëve të kësaj partie.
Ai u ndal në themelet e Vetëvendosjes, të cilat janë emri, program zhvillimor, si dhe statuti e zhvillimi i kësaj lëvizjeje, që sipas tij fal dhe kërkon falje.
Kurti gjithashtu u shpreh se ish-kreu i Vetëvendosjes i cili dha dorëheqjen, Visar Ymeri, ka dhënë një kontribut të madh në lëvizje.
Kurti shprehu keqardhjen që nuk ka një kundërshtar për zgjedhjet e 21 janarit.
Lëvizja Vetëvendosje është përballur me dorëheqje të shumta kohët e fundit nga mbështetës dhe deputetë të saj.
Në prezantim, nga 32 deputetë të këtij subjekti politik, ishin vetëm gjysma e tyre.
Deputetët e dorëhequr kanë kërkuar moskandidimin e Albin Kurtit në zgjedhjet e 21 janarit për kreun e partisë.
Por Kurti i bëri thirrje anëtarëve të Vetëvendosjes se nuk duhet të humbin kohë duke u marrë me kundërshtarët, por me qytetarët e Kosovës.