Kryeministri i Kosovës, Albin Kurti ka dënuar vrasjen e Liridona Ademajt dhe 14-vjeçares nga Maqedonia e Veriut, Vanja Gjorçevska.
Në një konferencë për mediet, Kurti ka kërkuar që policia mos mjaftohet vetëm me arrestimin e autorëve, pasi sipasj tij rastet po përsëriten. Kryeministri kërkon që Drejtësia të ketë prioritet rastet e grave dhe vajzave të dhunuara dhe autorët të marrin dënimin e merituar.
“Vrasjet e fundit, vrasja e porositur e Liridona Ademajt nga burri i saj dhe rrëmbimi dhe vrasja e 14 vjecares në Shkup, na ka rënduar mendjet dhe zemrat tona. Porositësit dhe kryerësit e rastit të Liridonës janë zënë e janë vënë prapa hekurave. Policia si kurrë po vepron shpejt e me efikasitet të lartë. Por s’po mjafton vetëm arrestimi. Sepse ata po e dinë që ka raste të ngjashme e jo të pakta, kur kriminelët lirohen e veprat po përsëriten edhe më rëndë se herën e parë. Kemi nevoje që krejt sistemi i Drejtësisë t’i bëjë prioritet rasteve të dhunës ndaj vajzave dhe grave. Nuk kemi si ta themi që duhet dënim meritor. Butësia e dënimit po shkakton përsëritjen e krimit. Vënia e drejtësisë është kusht i domosdoshëm për një shoqëri të lirë e demokratike e çfarë aspirojmë të mbesim përherë”, tha Kurti.
