Një zjarr me përmasa të konsiderueshme ka përfshirë një sipërfaqe të madhe në Parkun Kombëtar të Prespës, në territorin e Bashkisë Pustec. Që në orët e para të mëngjesit, rreth 75 forca operacionale janë angazhuar në një ndërhyrje të organizuar për izolimin dhe neutralizimin e flakëve.
Forcat janë të ndara në tre grupe dhe përfshijnë shërbimin zjarrfikës të bashkisë Pustec, punonjës të shërbimeve publike, përfaqësues të Agjencisë Rajonale të Zonave të Mbrojtura, si dhe forca të ushtrisë dhe policisë.
Ndërhyrja po përballet me vështirësi të mëdha për shkak të terrenit të thepisur dhe të paarritshëm me mjete zjarrfikëse. Situata rëndohet edhe më tej për shkak të mungesës së burimeve ujore në zonat ku zjarri ka intensitetin më të lartë.
Pavarësisht sfidave, forcat në terren mbeten të angazhuara për të mbajtur situatën nën kontroll dhe për të shmangur përhapjen e mëtejshme të flakëve në një nga zonat më të rëndësishme të mbrojtura në Shqipëri.
Autoritetet vijojnë vlerësimin e situatës dhe janë në gatishmëri për të ndërhyrë me mjete shtesë nëse kushtet atmosferike dhe terreni e mundësojnë këtë.
/vizionplus.tv
