Alarm i rremë për sulm bërthamor në Hawai

Komisioni Federal i Komunikimit të Shteteve të Bashkuara ka filluar  një hetim të plotë mbi ngjarjen që tronditi Hawain dhe SHBA.

Një alarm emergjent që paralajmëronte për një sulm me raketa bërthamore në ishujt  Hawai ka përhapur panik në të gjithë vendin. Njerëzit morën masat për evakuim përpara se të sqarohej se ishte një alarm I rremë i cili u dërgua gabimisht në telefonat celularë.

Në mesazh shkruhej: “Kujdes, një kërcënim bërthamor i drejtohet Hawait. Kërko një  vendstrehim të menjëhershëm. Kjo nuk është një stërvitje ushtarake”.

Guvernatori David Ige, kërkoi falje për gabimin dhe deklaroi se një punonjës i Agjencisë Shtetërore të menaxhimit të emergjencës kishte shtypur gabimisht një buton në sistem. Autoritetet  shtetërorë dhe komandat e Paqësorit të ushtrisë amerikane konfirmuan se mesazhi nuk ishte një kërcënim i vërtetë për shtetin.

Ky incident  vjen në një kohë kur tensionet e ndërkombëtarëve janë përshkallëzuar ndjeshëm mbi zhvillimin e armëve bërthamore të Koresë së Veriut. Hawai është baza e Komandës së Paqësorit, Flotës Paqësore të Marinës dhe disa strukturave të tjera të ushtrisë amerikane.