Kryetari i Partisë Aleanca për Ardhmërinë e Kosovës, Ramush Haradinaj ka reaguar pas aktakuzës ndaj presidentit Hashim Thaçi dhe Kadri Veseli për krime kundër njerëzimit, të tilla si vrasje, zhdukje të personave, përndjekje dhe tortura.
Në një postim në “Facebook”, Haradinaj tha se Ushtria Çlirimtare e Kosovës ka bërë luftë të pastër, duke shtuar se beson në pafajësinë e Thaçit, Veselit dhe bashkëluftëtarëve të tjerë.
“Populli shqiptar i Kosovës me të drejtë zhvilloi luftë për liri, pas shtypjes së egër nga regjimet e ndryshme serbe, që zgjati pothuajse një shekull, duke kulmuar me regjimin e Millosheviqit. Ushtria Çlirimtare e Kosovës ka bërë luftë të pastër, rezultat i së cilës ishte liria dhe themelimi i Republikës së Kosovës. Ne besojmë në pafajësinë e Presidentit Thaçi, kryetarit Veseli dhe të gjithë bashkëluftetarëve të tjerë.”
Zyra e Prokurorit ka bërë të ditur se në aktakuzë pretendohet se Hashim Thaçi, Kadri Veseli dhe të dyshuar të tjerë janë “penalisht përgjegjës për afërsisht 100 vrasje të paligjshme. Krimet e paraqitura në aktakuzë përshijnë qindra viktima të identifikuara shqiptarë, serbë dhe romë të Kosovës dhe kundërshtarë politikë”.
