Kryeministri izraelit Benjamin Netanyahu do të përballet me rifillimin e gjyqit të tij të gjatë për akuza të shumta për korrupsion, pas një pauze për shkak të luftës në Gaza.
Një gjykatë në Jerusalem do të nisë të hënën shqyrtimin e çështjes, e cila fokusohet në disa akuza për korrupsion kundër Netanyahut, sipas raportimeve në mediat izraelite. Gjyqi u ndërpre me një urdhër urgjent nga ministri i drejtësisë i vendit pas sulmit të Hamasit ndaj Izraelit më 7 tetor.
Netanyahu është akuzuar për mashtrim, ryshfet dhe shkelje të besimit në tre raste të paraqitura në vitin 2019, të njohura si Rasti 1000, 2000 dhe 4000.
Në rastin 1000, kryeministri, së bashku me gruan e tij Sara, akuzohen se kanë marrë dhurata, duke përfshirë shampanjë dhe puro, nga producenti i shquar i Hollivudit Arnon Milchan dhe biznesmeni miliarder australian James Packer në këmbim të favoreve politike, raporton Al Jazeera.
Akuzat për ryshfet sjellin një dënim deri në 10 vjet burg dhe/ose gjobë. Mashtrimi dhe shkelja e besimit dënohen me burgim deri në tre vjet.
Kryeministri më jetëgjatë i Izraelit ka mohuar çdo keqbërje. Ai pretendon se është viktimë e një “gjuetie shtrigash” të orkestruar politikisht nga rivalët dhe mediat për ta hequr atë nga detyra.
Gjyqi filloi në maj 2020 dhe është shtyrë në mënyrë të përsëritur për mosmarrëveshjet e mbrojtjes dhe prokurorisë dhe pandemisë COVID-19.
Ndërkohë, Netanyahu është akuzuar se ka përdorur legjislacionin në përpjekje për të anashkaluar problemet e tij ligjore.
Mes planeve të diskutueshme të kryeministrit për të riparuar sistemin gjyqësor, Izraeli ishte zhytur në muaj protestash përpara sulmeve të 7 tetorit.
Kritikët kanë thënë se ndryshimet e propozuara do të politizonin gjyqësorin dhe do të komprometonin pavarësinë e tij, do të nxisnin korrupsionin dhe do të dëmtonin ekonominë e Izraelit.
Netanyahu ka mbrojtur shtytjen dhe ka hedhur poshtë protestat, duke deklaruar se ai synon të rivendosë një ekuilibër të duhur midis tre degëve të qeverisë./Burimi: Al Jazeera
